CVMedia-მ RICDOG-ის საქმიანობისა და საქართველოში სამოქალაქო საზოგადოების გამოწვევების შესახებ სტატია გამოაქვეყნა

სომხურ მედიაპლატფორმა CVMedia-ზე ცოტა ხნის წინ გამოქვეყნდა სტატია — „წინ, საქართველო, წინ“: როგორ იბრძვის RICDOG სამოქალაქო საზოგადოების მომავლისთვის (“Forward, Georgia, Forward”: How RICDOG is Fighting for the Future of Civil Society), რომელიც სამეცნიერო-ინტელექტუალური კლუბი „თაობათა დიალოგის“ (RICDOG) გენერალურ მდივანთან, ირაკლი თევზაძესთან ინტერვიუს საფუძველზე მომზადდა.

სტატია საქართველოში სამოქალაქო საზოგადოების წინაშე არსებულ გამოწვევებს, ბოლო პერიოდში შექმნილ საკანონმდებლო და პოლიტიკურ გარემოსა და იმ საქმიანობას მიმოიხილავს, რომელსაც RICDOG პარტნიორ ორგანიზაციებთან ერთად სამოქალაქო საზოგადოების მხარდაჭერისა და დემოკრატიული ღირებულებების დაცვისთვის ახორციელებს.

სამოქალაქო საზოგადოება მზარდი გამოწვევების წინაშე

სტატიაში მნიშვნელოვანი ადგილი ეთმობა საქართველოში სამოქალაქო საზოგადოების საქმიანობისთვის შექმნილ გარემოს. საუბარია საკანონმდებლო ცვლილებებზე და იმ მზარდ ზეწოლაზე, რომლის პირობებშიც დამოუკიდებელ სამოქალაქო ორგანიზაციებსა და მედიას უწევთ საქმიანობა.

RICDOG-ის გამოცდილების მაგალითზე სტატია აჩვენებს, რომ შექმნილ გარემოში სამოქალაქო ორგანიზაციებისთვის გამოწვევა მხოლოდ საკუთარი საქმიანობის გაგრძელება აღარ არის — მნიშვნელოვანი ხდება საკუთარი უფლებების დაცვა, საზოგადოებასთან პირდაპირი კომუნიკაცია, სანდო ინფორმაციის გავრცელება და სხვა ორგანიზაციების მხარდაჭერაც.

ამ კონტექსტში სტატია განსაკუთრებულ ყურადღებას უთმობს RICDOG-ისა და ჩეხური ორგანიზაცია NESEHNUTÍ-ს თანამშრომლობას და პროგრამას „United for Democracy: Advocating for the Future of Civil Society in Georgia“.

პროგრამა მიმართული იყო, ერთი მხრივ, სამოქალაქო საზოგადოების ორგანიზაციების გაძლიერებისა და მათი საჭიროებების მხარდაჭერისკენ, ხოლო მეორე მხრივ – საზოგადოებისთვის სამოქალაქო სექტორის საქმიანობისა და მისი მნიშვნელობის უკეთ გაცნობისკენ.

საზოგადოებასთან პირდაპირი კომუნიკაცია

სტატიაში აღწერილია RICDOG-ის მიერ განხორციელებული საინფორმაციო და საზოგადოებრივი კამპანიებიც. ორგანიზაციისთვის ერთ-ერთ მნიშვნელოვან ამოცანად იქცა მოქალაქეებთან უშუალო საუბარი იმის შესახებ, თუ რას აკეთებენ სამოქალაქო ორგანიზაციები, რატომ არის მათი საქმიანობა მნიშვნელოვანი და რა გავლენას ახდენს ძლიერი სამოქალაქო საზოგადოება ქვეყნის დემოკრატიულ განვითარებაზე.

ეს განსაკუთრებით მნიშვნელოვანია იმ პირობებში, როდესაც საზოგადოებრივი სივრცე სულ უფრო მეტად ხასიათდება პოლარიზაციით, დეზინფორმაციითა და სამოქალაქო სექტორის წინააღმდეგ მიმართული ნეგატიური გზავნილებით.

RICDOG-ის მიდგომა ამ პროცესში ეფუძნება მოქალაქეებთან ღია კომუნიკაციას — შეხვედრებს, საინფორმაციო კამპანიებს, მედიის გამოყენებასა და საზოგადოებისთვის ინფორმაციის სხვადასხვა ფორმით მიწოდებას.

მხარდაჭერა სხვა სამოქალაქო ორგანიზაციებისთვის

სტატიაში საუბარია არა მხოლოდ RICDOG-ის წინაშე არსებულ გამოწვევებზე, არამედ ორგანიზაციის საქმიანობაზე სხვა სამოქალაქო ორგანიზაციების მხარდასაჭერად.

განსაკუთრებული ყურადღება ეთმობა რეგიონებში მოქმედი ორგანიზაციების საჭიროებებს. მათთვის სწრაფად ცვალებად გარემოში განსაკუთრებით მნიშვნელოვანია სანდო ინფორმაციის, პროფესიული კონსულტაციისა და თანამშრომლობის შესაძლებლობებზე ხელმისაწვდომობა.

ამ მიმართულებით RICDOG მუშაობს სამოქალაქო ორგანიზაციებისთვის ინფორმაციის გაზიარებისა და სხვადასხვა ტიპის მხარდაჭერის შეთავაზებაზე. ორგანიზაციისთვის ერთ-ერთ პრიორიტეტად რჩება იმერეთში მოქმედი სამოქალაქო საზოგადოების წარმომადგენლების გაძლიერება და რეგიონში თანამშრომლობის შესაძლებლობების განვითარება.

სამოქალაქო საზოგადოების ხმა საერთაშორისო სივრცეში

CVMedia-ზე გამოქვეყნებული სტატია RICDOG-ისთვის კიდევ ერთი შესაძლებლობაა, საქართველოსა და განსაკუთრებით რეგიონებში მოქმედი სამოქალაქო საზოგადოების გამოცდილება საერთაშორისო აუდიტორიას გაუზიაროს.

ორგანიზაციისთვის მნიშვნელოვანია, რომ საქართველოში მიმდინარე პროცესებისა და სამოქალაქო საზოგადოების წინაშე არსებული გამოწვევების შესახებ ინფორმაცია ქვეყნის ფარგლებს გარეთაც გავრცელდეს და საერთაშორისო პარტნიორებმა უშუალოდ ადგილობრივი ორგანიზაციების გამოცდილებიდან მიიღონ ინფორმაცია არსებული მდგომარეობის შესახებ.

RICDOG აგრძელებს მუშაობას სამოქალაქო საზოგადოების გაძლიერების, დემოკრატიული ღირებულებების დაცვის, ახალგაზრდების მონაწილეობისა და საზოგადოებასთან ღია დიალოგის მიმართულებით.

სტატიის სრული ინგლისურენოვანი ვერსია ხელმისაწვდომია CVMedia-ს ვებგვერდზე.

სტატიის სრულად ნახვა CVMedia-ზე